डीलरक किरदानी

डीलरक किरदानी 

गाम गाम में शोर भेल अछि , 
डीलर अछि बेईमान 
सभक मुँहे सुनि रहल छी, 
डीलर अछि शैतान
लाबै छथि राशन जनता के नाम पर
आ तुरंत विदा भ जाइत छथि दुकान पर
दूकानदार सँ कनफुसकी क' क'
दस बजे रातुक समय द' क'
सुन दलान देखि अबीह' बौआ
एकटा बड़का बोड़ा ल' क'
पाई नगद तू लेने अबीह'
दाम में नै तू घिच - पिच करिह'
कियाक त' गारिक हार हमहि पहिरै छी
जनता के श्राप हमहि लैत छी
हाकिम के घुस हमहि दैत छी
तैयो हम चोरे कहबै छी
गौंआँ के बुरबक बनाबी
अपने हम हाकिम कहाबी
सब कियो आगा पाछा करैया
घुस में पान तमाकुल दइया
तैयो हम करै छी मनमानी
ककरो कोनो बात नै मानी
दस बोड़ा हम चीनी रखने
तोरे सब के लेल
बाँकी जे दू बोड़ा बाँचत
जनता के ठकी लेब
गाम में दस टा मुँहगर कनगर
मुंह तकर हम भरबै
बाँकी सब ठाम झूठ बाजी क'
चोरी हमहि करबै
अगिला खेपी तेल आनब
तू तखनहि रहिह' सचेत
रस्ते में तू ठाढ़ रहिह' पाई टीन समेत
गाम पर अनिते देरी
भ' जाइया हेरा फेरी
मुखिया जी बदमाशी करैया
टीन झोरा ल' एतय अबैया
दस किलो चीनी आ तेल
ओकरो मंगनी देबय पड़ैया
मुदा दस किलो चीनी आ तेल पर
मुखहिया जी सकदम
टकरा बाद जे मोन करैया
करै छी अपने मन
टकरा बाद किरानी सबके
झूठ बाजी छी हमहि ठकने
लोक सब हमर किरदानी के
महीना में दस टा दैत अछि दरखास
जा गांधी (पांच सौ ) द' आफिसर के
तुरंत करा दैत छी बरखास
घुसक छैक एखन जमाना
तेन ने हम छी बनल दिबाना
चारि साल धरि कहुना कहुना
ई कोटा चलि जाएत
पाँचम साल बुझह
सीमेंट जोड़ी दू तल्ला पिटायत
बेसी तोरा की कहिय'
एहि में घर बैसल बड्ड नफ्फा
मुदा आशीर्वाद में कखनो
घर घरायण सब सफ्फा 


(१९९२ के डायरी सँ )
Sanjay Jha -
नागदह , मधुबनी ,

मिथिला ------

ककरा कहबई के सुनतै सब लागई बहिर अकान सन

ककरा कहबई के सुनतै, सब लागई बहिर अकान सन

आब बुझैया भारतक हालत, भ गेल छै कंगाल सन

चुनाव लड़ई लेल ठाढो होई छै, सबटा चोर उच्चका सन

ककरा राखु, ककरा छोरु, विधिना भ गेल वाम सन

मोन त होईया, तेना हटाबी, मडुआ सन किछु पटुआ सन

ककरा कहबई के सुनतै, सब लागई बहिर अकान सन ।

स्वतंत्रत भेला पर देश ख़ुशी भेल, ख़ुशी होयते फेर दुखी भेल

नहि बितल किछुओ दिन, देश दू भाग तत्क्षण बटी गेल

बटिते देरी खून खारापा, कतेक मरि गेल कतेक कटी गेल

ख़ुशी के आँशु दुखी में बटी गेल, कतेक घर के नामोनिशान जे मिटी गेल

देश के किछु भागक हालत, भ गेल छल श्मशान सन

ककरा कहबई के सुनतै, सब लागई बहिर अकान सन ।

माछ भात के बात त छोडू, सागक नै अछि कोनो जोगार

देशक हालत एहन अछि केने, मंहगी चढ़ल अछि बीचे कपार

बाज़ार आ हाटक नामे सुनि क, पकडैत छि अपन कपार

नेता आ राजनेता सब के, नै छनि किनको एकर विचार

इ सब सोची माथ काज नै करैया, भ गेल छि सुन्न अकान सन 

ककरा कहबई के सुनतै, सब लागई बहिर अकान सन ।

पहिले जे छल देशक हितगर, नाम ओकर छल सेनानी

आब कियो छथि एही तरहक ? जकर होई कियो दीवानी

हिनकर सबहक हालत देखि क, मोन करैया खूब कानी

अपना लेल इ सब खूब कमेला, जनता चाहे भरै पानी

आब कहु मोन केहन लगैया ? लगैया उजरल बांग सन

ककरा कहबई के सुनतै, सब लागई बहिर अकान सन ।

संजय कुमार झा "नागदह"

दिनांक : ०४/०९/२०१३